Valletta FC l-ikbar Klabb f’Malta
23/08/2024
Valletta FC huwa l-klabb li għandu l-akbar appoġġ f’Malta fost dawk il-Maltin li għandhom ‘il fuq minn 16-il sena u jissapportjaw Club tal-football Malti. Riċerka li saret minn Sagalytics turi li l-Club Belt jgawdi l-akbar appoġġ tas-sapporters Maltin, b’aktar minn 27,000 persuna li jappoġġjawh.
Il-President ta’ Valletta FC Claudio Grech qal li “dan ir-riżultat jikkonferma l-appoġġ b’saħħtu li għandu l-Club u li huwa dak li jiddistingwiħ minn clubs u assoċjazzjonijiet oħra. Il-lealta tal-eluf ta’ sapporters tagħna hija l-qalb ta’ dan il-klabb li ser jagħmel mill-Valletta FC l-aktar brand sportiva b’saħħitha fil-kamp sportiv f’pajjiżna. Dan l-appoġġ jimlina b’kuraġġ kbir, partikolarment fid-dawl taċ-ċirkostanzi diffiċli li għaddejjin minnhom u ser nagħmlu l-almu kollu tagħna biex inrodduħ lura lis-sapporters tagħna b’ħidma ma’ taqta xejn fil-pitch u fl-amministrazzjoni.”
Minn kampjun ta’ 600 persuna li intgħazel b’mod rapreżentattiv tal-popolazzjoni Maltija fost dawk ta’ 16-il sena u aktar, meta n-nies ġew mistoqsija “liema team tal-football lokali t’appoġġja?”, l-aktar team li kiseb appoġġ huwa Valletta FC. Meta wieħed jinkludi ċ-ċittadini Maltin kollha, b’hekk wieħed jinkludi ukoll dawk li qalu ‘Li ma jsegwux football’ (42.6%), kif ukoll dak li qalu li ma jappoġġjawx team wieħed lokali partikolari (16.1%), wieħed jsib li 7.6% mill-poplu Malti qalu li jappoġġjaw lil Valletta FC. Meta wieħed jeskludi dawk li ma jsegwux football jew dak li ma jappoġġjawx team partikolari tal-football lokali, wieħed jsib li kważi 1 minn kull ħamsa (18.3%) fost dawk li jsegwu l-football lokali qalu li jappoġġjaw lit-team tal-football tal-Belt. Dan jpoġġi lil Valletta FC bhala l-aktar football club f’Malta li għandu appoġġ fost ic-cittadini Maltin. Meta wieħed jikwantifika f’numru ta’ ċittadini Maltin jirriżulta li madwar 27,000 persuna ta’ 16-il sena u aktar jappoġġjaw lil Valletta FC.
Il-Viċi President responsabbli mill-qasam kummerċjali Joe Caruana Curran Jr spjega kif ir-riżultati ta’ dan is-survey jikkonfermaw l-appoġġ qawwi li għandu Valletta FC f’pajjiżna.
“L-interess enormi li qed ikollna minn partners kummerċjali u sponsors potenzjali hija xhieda tas-saħħa tal-brand Valletta FC. Huwa evidenti li dawn il-partners qed jaraw lilhom infushom bħala imsieħba ewlenin fil-proġett tagħna biex Valletta FC jerġa’ jkun klabb ewlieni fil-football Malti”.
